فضّينه الدمـــــــــــــع عل وجنه چكليت

او وزعنه االجـــــــــــرح لأجلك ثوابات

نضحك من چـــــــــذب ونغشمر الروح
وأنگول الوطن ها بعــــــــــــده ما مات

مامات الوطــــــــــــــن عايش بلا روح
ولا مات الشعب بس شبــــــــه الاموات

حماماتك يتامى والقفــــــــــــــص جوع
انكسر خاطر جنح ذيــــــــــج الحمامات

الشوارع گبــــــــــل چانت تحضن العيد
وهسه اتحاضنـــــــــــــت وياها عبوات

وانه من امشي بدرب ما اعثــــــر بناس
اتعثــّـر خطوتي بكثــــــــــــــر العصابات

وشلت لأجلك هويه برگبــــــــــة الخوف
لأن صار الذبــــــــــــــح بس عل هويات

عراقي أنته ... أنذبح ... بس بالك تموت
وخل صــــــــــــوتك يدگ بوب السماوات

يمن بيك المشانـــــــــق صارت أغصان
ويمن طفلك رضـــــــــع ثدي المجاعات

وأمس صبـّت أغيومك بس دمـــه أعليك
من غصبوا حرمتــــــــــــك و الحضارات

وعلى شفافك بعد ما خضـّـــــــر الريـع
ونزح شوگ المطــــــــر من السحابات

وبساتينك حــــــــــزن وأنهارك ادموع
وگيعانـــــــــــــــك خريطه من المعاناة

وعلى خدودك ذبـل وكت الصبح ليش ؟
وتكـّف ردن الشمس بيــــــك المسافات

ولكن تبقى روحك يا وطــــــــــــن دوم
مثل ورده وتعاشــــــــــــرها الفراشات

الورد يذبــل لچن ... يبقى العطــــر بيه
مثل صــــــــوت الحسين اينادي هيهات